Соодветни играчки

Играчки за деца 1 – 2 години

Играта е двигател на развојот на детето на рана возраст. Преку неа децата го осознаваат светот, растат и се развиваат. Родителите/негователите на детето треба да ја почитуваат оваа нивна потреба и да создадат услови во кои тие ќе можат активно да истражуваат. 

Еден од најважните средства кои треба да им се обезбедат на децата се играчките кои се соодветни за нивната возраст, како и развојното ниво, а преку кои кај детето ќе се стимулира на развојот.

Играчки за развој на детето од оваа возраст што треба да ги испробате:

Чаши во различна големина

• • • покрај тоа што овие играчки помагаат за детето да ја увежба координацијата око – рака, овие играчки го стимулираат когнитивниот развој кај детето. Можете да сокриете помали предмети под чашките и потоа да направите игра на барање на истите, при што се стимулира детето да ги подига чашите. Исто така чашките можат да се редат како кула при што децата ја развиваат способноста за анализа, споредба на големина и решавање проблемски ситуации по пат на обиди и грешки

Играчки со тркала

• • • играчките на тркала како што се колички, возови, камиончиња или колички за бебиња, помагаат и ги охрабруваат децата да ја истражуваат својата околина посамостојно. Едновремено ја подобруваат нивната координација и фината моторика

Коцки за градење

• • • коцките за градење можат да му помогнат на детето за развој на когнитивните функции и за учење на форми. Коцките со кои детето ќе си игра треба да се прилагодени на возраста, на пример кога се помали децата коцките треба да се поголеми, а како децата растат големината на коцките се намалува. Во секој случај, нема ништо попривлечно за едно дете од тоа да изградите висока кула од коцки, која после тоа ќе ја сруши

Нетоксични бои за боење со прстиња

• • • боите за боење со прстиња се секогаш интересно откритие за малите деца. Тие ќе бидат презадоволни од играта со бои. На голем картон можете заедно со Вашето дете да правите прекрасни уметнички дела

Песок

• • • во играта со песок секое дете ужива. Полнењето на некој сад со песок и истурање на истиот предизвикува вистинско задоволство за детето, а едновремено е одличен начин да детето си игра самостојно (со надзор од родителите) и да ја истражува и запознава околината. Децата можат со часови да играат со песок. Преку оваа игра тие ја увежбуваат координација на движењата, ја подобруваат фината моторика, а што е најважно уживаат

Сложувалки

• • • едукативни играчки, кои и покрај својата едноставност, се одлично средство за учење и развивање на животните вештини кај децата од најрана возраст
    • оптимално време да се понуди сложувалка на бебињата е откако стабилно ќе седнат и со рацете ќе почнат да удираат на маса, да удираат два предмети еден од друг, да вадат предмети од кутија, да ја истураат, фрлаат и повлекуваат сѐ што им е на дофат. Во тој период тие не ја составуваат сложувалката, туку стекнуваат искуства за нејзините делови – ги држат во раце, ги ставаат во уста, ги гледаат, ги удираат еден од друг
    • за детето понудете сложувалка со вметнување на еден елемент во вдлабнатина. На пр. круг кој треба детето да го стави во вдлабнатина, без да мора да го подига, туку со лизгање. Потоа следуваат едноставни сложувалки од 2 до 10 парчиња (делови) кои треба да бидат големи, едноставни форми, сложувалки на една тема, препознавање на слики од деловите и преклопување на истите, животни, овошје и зеленчук. Материјалот треба е најчесто од дрво и деловите да влегуваат во длабнатина и да имаат дршки/рачки за полесно држење