Самопослужување – грижа за себе
од 3 до 7 години
По раѓањето децата целосно зависат од своите родители, но како што растат се случуваат и големи пресвртници во нивните животи на пример, учат да држат шише, да седат, туркаат или влечат предмети, да држат прибор за хранење, учат да ползат и на крајот самостојно се движат. Самостојното движење отвора сосема нов свет за овие мали деца и претставува можности да почнат да ги развиваат способностите за грижа за себе и независност.
Грижата за себе вклучува низа вештини кои всушност се секојдневни задачи кои на децата ќе им овозможат да бидат подготвени да учествуваат во животни активности (соблекување/облекување, јадење, миење на забите и друго). Тие честопати се нарекуваат активности на секојдневно живеење.
Да му се даде шанса на детето да се стекне со вештини за грижа за себе е важен дел од неговиот раст и развој. Времето и напорот кои ќе ги вложите во поттикнување на грижа за себе, е сигурен начин да му се помогне на Вашето дете да се чувствува способно. Учењето да се облекуваат, да мијат раце, да си го носат ранецот и други едноставни задачи им помагаат на децата да развијат чувство на автономија и одговорност.
Учењето на детето да прави едноставни задачи за самопослужување е сигурен пат за поддршка на развојот на самодовербата кај секое дете.
Да му дадете време на детето да ги учи вештините на самопослужување, да имате трпение и да го поддржите детето во оваа област уште на најрана возраст, значи да влијаете на неговата долгорочната благосостојба и среќа.